ماوەیەک پێش لە لایەن دامەزراوەی چار، به‌رێزان سۆران پاڵانی و ئەمین سورخابی وتووێژێکی دوورو درێژو مێژووییان لەسەر زۆر بابەتی ڕابردووی حیزبی دیموکراتی کوردستان بە نێوی (حیزبی دیموکرات لە دامەزراندنیەوە تا ئەمڕۆ) لە گەڵ من و بەڕێز کاک مستەفای شەڵماشی کرا. ئەو لە وڵاتی هۆڵەند و من لە کوردستانەکەی خۆمەوە. زۆر پرسیارو وەڵامی گرینگ لە باسەکانماندا هەبوون، یەک لەو پرسیارانە باسێک لە لادان و خۆبەدەستەوەدانی گروهی حەوت کەسی بوو. ئەوەی پێویست و ڕاست ودروست بوو بەش بە حاڵی خۆم باسمانکرد. بەڵام وا دیارە لە کوردستانی ئێمەداو لەناو جوڵانەوە سیاسییەکان و گێرەو کێشەکاندا زۆر کەسی عینادو لەخۆ رازی دەرس لە مێژوو وەرناگرن و ناشیان هەوێ دان بە هەڵەکانی خۆیاندا بنێن بۆ ئەوەی خەڵکە باشەکەمان و کەسوکاری شەهیدەکان بیانبوورن و چاوپۆشی لەو هەموو لادان و خۆتەسلیم کردنانەیان بکەن، کە بە خۆیان و بەو هەموو کوڕە گەنج و خوێن گەرم و بە ئاگاو دڵسۆزانەوە خۆیان له باوەشی کەسانێک هاویشت کە لە تاران، ئیسفەهان، شیراز و تەورێزەوە هەتا کوردستان ئەو هەموو کچ و کورو لاوو پیرو ژن و منداڵی ئەو خەڵکە بێ تاوانەیان ئیعدام وگولە باران کرد. هەتا گەیشتنە قارنێ و قەڵاتان، پاوەو هەورامانان و تۆپبارانی مەهاباد و شارەکان. ئەوەی ئەو ڕژیمە دڕندەیە بەسەر پاوەو هەورامان، سنەوە و سەقز، بانەو سەردەشت و مەهابادیدا هێناوە، لەگەڵ شەهیدبوونی 59 لاوی مهابادی کە یەک لەوان تەمەنی خوار هەژدە ساڵ نەجاتی جگەرگۆشەی هونەرمەندی گەورەی کوردستان نه‌مرکاک محه‌ممه‌د ماملێ بوو، هەر بەو هۆیەشەوە ئەو کەڵە پیاوە توشی نەخۆشی فەرامۆشی(لەبیر چوونەوە) هاتوو گیانی پاکی فیدای کوردستان کرد. هەر ڕاست لەکاتی خۆ بەدەستەوەدانی ئەو گروپە ئەو ڕێژیمەی کە ئەوان پاڵیان وێدا قارەمانی کەم وێنەو پێشمەرگەی کوردستان سەرگورد حەبیبوڵڵا عەباسیان تیرۆر کرد. ئێستاش وەک نە بای هاتبێ و نە باران، حیزبی دیموکراتی کوردستان بە هەڵگیرسێنەری شەڕ دەناسێنن و هەزار ئاوی پاک بەلاشەی گڵاوی خومەینی وخاڵخاڵی و رەفسەنجانی و خامنەیی گۆجەدا دەکەن. لەسەر ئەو هەموو بەدبەختی و ماڵوێرانی کە ئەو ڕژیمە دڕندەو مرۆڤکوژە بەسەر گەلانی ئێرانیدا هێناوە ئێوەی خۆبەدەستەوە دەریش لەگەڵ حیزبی تودەی سەر دەستەی تەسلیم تەڵەبان و موجاهدین و چریکی ئەکسەریەت دنیاتان پڕ کردبوو بۆ دیفاع لە خومەینی و دارودەستەکەی. کاتێک کە دەهۆڵی پێهەڵا کوتنەکەتان دڕاو کاری پێتان نەما هیچ شتێک نەما کە بەسەرتان نەهێنێ و لێتان نەکوژێ، بەو حاڵەشەوە تەنبێ گرتوو نەبوون و بەو پەری ڕوو هەڵماڵاوی حیزبی دیموکرات و باقی حیزبە شۆرشگێڕەکان بەشەڕ هەڵگیرسێن ناوزەد دەکەن.
شەهید د.قاسملوو بۆ پاڕله‌مانی ئێران بە زۆرینەی دەنگ دیاریکرا، بەڵام خومەینی هەڕەشەی کوشتنی لێکردوو ڕێگریان لێکرد. بە ویژدانەوە دەڵێم ماوەی زیاتر لە شێست ساڵە ئاگاداری هەموو دانوستانەکانی باشووری کوردستان و ڕۆژهەڵاتی کوردستانم یەک بەرپرسم نەدیوە بەقەدەر شەهید د.قاسملوو دژی شەڕ و لایەنگری ئاشتی بێت. نمونەی ڕوون و بەرچاویش شەهیدبوونەکەیەتی کە هەر لەو ڕێگایەو لەسەر مێزی دانوستاندا شەهید کرا. خۆ هەموو لایەک لەبیریانە کە ناحەزان چەندەیان کەلیمەی سازشکاری و تەسلیم تەڵەبی لەقاودا، هەر ئەو حیزبی دیموکراتەی کە ئەو هەموو ناو ناتۆرو پڕۆپاگەندەیان بۆ بڵاو دەکردەوە بۆ ئەوەی کە ئەو ڕێژیمە ئینسانکوژە وادار بکا مافە ڕەواکانی گەلی کورد دان پێدا بنێ تەنانەت خودموختاریەکەشی لەچەند مادەیەکی وەک ئازادی حیزبەکەمان و ئینتزامات و خوێندن بە زمانی دایک خولاسە کردبۆوە. بابەتێکی دیکە کە ئێوە بە شێوەیەکی ناعادڵانە تۆمەتی وابەستە بوون بەحکومەتی ئێراقەوە بەخودی شەھید د. قاسملوو و حیزبی دیموکراتەوە دەنوسێنن لە حاڵێکدا لەدوای بەیانە مێژوویەکەی ١١ی ئازاری ساڵی ١٩٧٠ وە بە دوای کۆنفراسی سێ دا و یەکگرتنەوەی هەموو لایەکمان و گەڕانەوەی د. قاسملوو بۆناومان، ئێمە لەسەر داوای نەمر بارزانی ڕەحمەتی پێوەندیمان بە حکومەتی ئێراقەوە گرتوە، لەو کاتەوە هەتا ئاخر ڕۆژەکانی پەیوەندیمان حیزبی دیموکرات چکۆڵەترین لاوازیەکی دە بەرامبەر حکومەتی ئێراقدا نەبوە، بە تایبەتی زیندە یاد کاک محه‌مه‌د ئه‌مین سیراجی کە بەرپرسی ئەو پەیوەندیە بوو وەک کێو دە بەرانبەر ئەو بەعسیە دڕندانەدا ڕادەوەستا. زۆر جاران موخابراتی عام لای د. قاسملوو گازندەیان لێدەکردو داوای گۆرینیان دەکرد بەڵام ئەو بەگوێی نەدەکردن. نمونەی پاکی وسەداقەتی پەیوەندی حیزبی دێموکرات و حکومەتی ئێراق قسەکانی بەڕێز د. مەحمود عوسمانە لەکاتێکدا کە ڕێژێمی بەعس ڕووخاو هەموو پەروەندەکان کەوتنە دەستی خەڵک، ئەو کە پەیوەندی لێکۆلینەوەی ئەو پەروەندانە بوو چەند جار بە نوسراو بە وتار ڕایگەیاند و بڵاویکردەوە کە حیزبی دێموکرات پاکترین وسالمترین پەیوەندی بووە وە هیچ هەنگاوێکی بە قازانجی حکومەتی ئێراق و بەزەرەری هیچ کەس و لایەنێک و سازمانێک هەڵ نەهێناوەتەوە. دیارە مەبەستی من لە پاکیدا بۆ پەیوەندی بە داگیرکەرانی کوردستانەوە تەنیا حیزبی دیموکرات نیە حیزبەکانی ڕۆژھەڵات بە دیموکرات و چریک و راهی کارگەر و کۆمەڵەکان و خەباتەکانەوە یەکجار زۆر سادقانەتر بووە لە باقی کوردەکانی بەشەکانیتر.
ئەو برادەرە باس لەوە دەکا کە گۆیا من و کاک حەسەنی ڕەستگار لەگەڵ ئەو ڕەوتە بوبین!!! یەکەم شت کاک حەسەنی ڕەستگار لە ساڵی ١٩٥٩وە کە لەگەڵ مامە غەنی و زۆری دیکە زیندانی بوون لەسەر بۆچونی جیاوازی ناسیۆنالیزم بوون وتودەیی بوون نە قەت هاوفکری مامە غەنی و تودە نماکان بووە نە نێوانی خۆش بوە لەگەڵ مامە غەنی. منیش هەتا ئەو کاتەی کە بۆم دەرکەوت کە له گەڵ حکومەت و تودەییەکان دەکەون دیفاعم لێدەکردن، بەڵام هەر ڕۆژی ئیمزا کردنی نامە گۆڕینەکە من ڕیزی خۆم لێ جودا کردنەوە و ھەڵوێستم گرت. لەگەڵ کاک حەسەن و کاک هاشمی کەریمی کەوتینە نێوانیانەوە بۆ هێورکردنەوەی مەسەلەکە. بەڵام هەم مامە غەنی وە هەمیش برادەرانی دەفتەری سیاسی لە گەڵ ئەوەی قەولیشیان بەمەدا کە دەست ڕاگرن پەلە نەکەن، کەچی بە داخەوە هەردوک لایان بێ بەڵێنیان کردوو دەستیان کرد بە پڕۆپاگەندە دژی یەکتری. مەسەلەی کۆبوونەوەی برایمە لەگەڵ ئەوەی باشتان دەزانی کە مامە غەنی بەدرۆ منی هێنا بۆ ئەوێ و هەر لەوێش ڕوون بۆوە کە مشاوور دەعوەت نەکراون منیش ھێور بومەوە، چون پێشتر مامە غەنی بەمنی گووت مشاوور دەعوەت کراون بەڵام بەتۆیان نەگوتوە. ئەو کاتەی کە مامە غەنی دەعوەتی منی کرد بۆ هەڵوێست گرتن و ئیمزا کردن، من و کاک حەسەنی ڕه‌ستگار و نەمر کاک کەریم حەداد وێکڕا بووین، کە مامە غەنی نامەکەی بۆ خوێندینەوەو وای نواند کە پاڵ وە حکومەت دەدەن ئێمە هەرسێکمان دژایەتیمان کرد و ئیمزامان نەکرد، بەڵام نەمر مامۆستا هێمن ئیمزای کرد وە گوتیشی غەنی ئەمن لەداخی د. قاسملوو و مەلا عەبدوڵڵا ئیمزای دەکەم بەڵام بۆ ناو حیزبی تودە تێدا نیم. بابەتێکی یەکجار زۆر هەستیاری دیکە ئەوەیە کە من لەژیانمدا لاواز کوژ نەبووم و ڕامگرتوە قەتم باسنەکردوە بەڵام ئێستا کە قسەت ئاوا بڵیندو ڕەوانە و دیفاع هەر لەو ڕەوتە تەسلیم تەڵەبە دەکەی بە پێویستی دەزانم ئەو مەسەلەیە بۆ کۆمەڵانی خەڵک ڕوون بکەمەوە. ئەو کاتەی کە بەرپرسی کومیتە شارستانی سەقز بووی شێوە جاسووسیەکه‌ت بە قازانجی حکومەت و بە شێوەی خەیانەتی ڕەحمان کەریمی کە نەیهێشت پادگانی خانێ بگرین و ڕاپۆرتی لێداین جەنابیشت عەینی خەیانەتی ئەوت دووپات کردەوە، بۆیە ڕێگڕ بووی بۆ گرتنی پادگانی سەقز، ئەویش بەو شێوەیە کە باسی دەکەم و شاهیدیش زۆر ماون. ڕۆژانی ١٤و١٥ ی مانگی ٧ی ١٩٧٩ دەفتەری سیاسی لە کۆبونەوەیەکدا بڕیاریدا من وەک بەرپرسی یەکەمی شۆرای نیزامی بە هێزێکی زۆرەوە بە هاواری پاوەو هەورامانه‌وە بچم. منیش یەک دوو رۆژ دواتر بە پەنجا ماشێن وهێزێکی زۆرەوە کە بەشی زۆری بەرپرسەکانی نیزامی و کاک مه‌لا محه‌ممه‌د جوانڕۆ (ئه‌بو تارا) لەگەڵبوون بە بەرچاوی هەموو پایەگاکانی حکومەتدا شەو نیوە شەوان خۆمان گەیاندە گوندی دوو ڕووی شێخ عوسمانی بیارە، بەو نیوە شەوە موریدەکانی شێخ و پیاو ماقوڵانی ئەو ناوە لەماڵی شێخ لێمان کۆبونەوەو دەپارانەوە دەیانگوت قیادەی موەقەتە سەر ڕێگایان گرتوە بەهیچ شێوە دەرباز نابن، سەر ڕێگاو جێگاکەشیان ئەوەندە ئاستەمە ئەگەر پەنجا کەسی وانی لێ بێ ئێوە بە هەزاران کەس ناتوانن بچن. لە هەموو برادەرەکانمان تەنیا کەریم خاڵدار لەگەڵ من هاورا بوو دەمانگوت ئێمە بەهاواری خەڵکی لێقەوماوی خۆمانەوە دەچین، قیادە موەقەتە هەقی نیە ڕێگامان لێ بگرێ. بەڵام کاک مه‌لا محه‌ممه‌دی جوانڕۆ و هەموو بەرپرسەکانی دیکە لەگەڵ موریدەکان و خەڵکی ئاوایی نەزەریان ئەوە بوو دەیانگوت قیادە موقەتە ناهەقەو نابێ ڕێگا لە ئێمە بگرێ، بەڵام ئێمە نابێ ئەو کارە مەترسیدارە بکەین. ئەوەبوو ئێمە هاتینەوە سەقز و ساغبوینەوە لەسەر گرتنی پایەگاکانی سەقز. درەنگانی شەو لەگەڵ جەنابت و کومیتە شارستان کۆ بوینەوە بۆ ئەوەی هاوکاریمان بکەن و ڕێنوێنمان بن، نیشان بەو نیشانەی لە عەینی کاتدا مامۆستا شێخ جەلال حوسینی هات و داوای پەنجا پێشمەرگەی لێکردم چونکە پێشمەرگەکانیان لە سێڕای تیکاب لە کەمین کەوتبوون لە عەینی کاتدا کاک مه‌لا محه‌ممه‌دی جوانڕۆ نامەو بەرقیەی بۆ د. قاسملوو بەڕێکرد کە ئێمە بە تەماین و نیازی ئەو کارەمان هەیە، ئەویش بە باشە جوابی داینەوە. ڕاستی مەسەلە لێرە دایە چونکە ئەتۆ یەکجار زۆر هاڵۆزو نیگەران دیاربووی و هەر قسەی هاتەران پاتەرانت دەکرد نە منیش و نە هیچ برادەرێکی حیزبی بیرمان لەوە نەکردبۆوە کە ئێوە وەک ئەندامی سەرکردایەتی حیزب هێندە خەمخۆری ئەو حکومەتە دڕندەیە بن ھەر عەینی کات بە دزی ئێمە پەیوەندیت بە د. قاسملوو گرتووە و پێت گوتوە ئەگەر لەو کاتەدا ئەو کارە بکرێ و پادگانی سەقز بگیرێ وەزعی سەقز دەشێوێ و لەزەرەر زیاتر هیچ قازانجی نابێ. د. قاسملوو باوەر دەکاو نامەیەکی وەک بێسیم بۆ من نوسیوە کە هەم لە کتێبەکەمدا «سەربردەی ژیانم» ئەو نامە هەیە هەمیش لەگەڵ ئەو نامیلکەیە بڵاوی دەکەمەوە. دوکتۆر داوام لێ دەکاو دەڵێ مهاباد لە خەتەر دایە بە خۆت و بەهێزەکەتەوە بەپەلە بگەڕێنەوە مەهاباد، بەداخەوە دکتۆرت وا نیگەران کردوە لە نامەکەیدا سەعاتی سفری داناوە کە دەبێتە نیوە شەوی ٢٩/٥/١٣٥٨. ئەوە کارنامەی کاری جەنابتە، کەچی دوای ئەو هەموو خەیانەت و جینایەت و کوشت وکوشتارانە کە ئەو ڕژیمە نا ئینسان و دڕندەیە بە تێکڕای گەلانی ئێرانی کرد بەبێ فەرق وجیاوازی تازە بە تازە دوای زیاتر لە ٤٥ ساڵ حکومداری ئەو دێوەزمەی زەمانە ئاوی پاک بەداوێنی ناپاکیاندا دەکەیی و هێزە ڕەسەنەکانی گۆرەپانی کوردستان کە تەنیا مەبەستیان ئەوە بوو بەرگری لەخەڵک و خاکی پیرۆزی کوردستان بکەن بە شەڕخوازو شەر هەڵگیرسێنیان دەشوبهێنی. لەگەڵ ئەوەی ئەو هەموو شەهیدە سەربەرزە لەو ڕێگایەوە پێشکەش بە خاکی کوردستان کراون. هیچ گومانم نیە ١٣ شەهیدی بنەماڵەی ئێمە، وە هەموو شەهیدانی کوردستان و سەرتاسەری ئێران لە گۆریشدا بە خۆیان و کەسوکارە سەربەرزەکانیانەوە نەفرەت لەو ڕێڕەوەی ئێوەو هەموو ئەو کەسانە دەکەن کەبونە پاڵپشتی ئەو حکومەتە دڕندەو ئینسان کووژە.
دێمەوە سەر ئەو پڕوپاگەندانەی کە بەقازانجی ڕژیمی پەت و سێدارە بۆ حیزبی دیموکرات و شەهید د. قاسملووتان هەڵدەبەست و تۆمەتی دە ملیوێن دۆلارتان دەدایه پاڵ کە هەر فڕی بە سەر ڕاستییەوە نەبوو، چونکە ئەمریکاش هەر ئاواتە کۆنەکەی دەورانی تودەیی بونی د. قاسملووی لێدەدایەوە و هیچ ڕابیتەیەکی باشی لەگەڵی نەبوو، خۆزگە تۆمەتەکەتان ڕاست بایە، لە لایەکیترەوە، د. قاسملووتان بە شەڕخواز پێناسە دەکرد لە حاڵێکدا لە گەرمەی شەڕی ماڵوێرانکەری ئەو دوو ڕژیمە دڕندەو ئینسان کوژەدا حیزبی دێموکرات بە پێشنیاری ئەو ڕایگەیاند ئەگەر بێت و كۆماری ئیسلامی مافە ڕەواکانی میللەتی کورد دان پێدا بنێ ئێمە وەک حیزبی دیموکرات ئامادەین پێشمەرگەکانمان شان بە شانی كۆماری ئیسلامی دیفاع لە تەمامیەتی خاکی ئێران بکەین، لەوەی ئاشتیخوازتر دەبێ چیتر بێ، ئەگەر ئەو بۆچونە وابەستە بوون بێ دیارە تۆمەتەکانی ئێوە دەبێ ڕاست بێ.
باس لەوە دەکەی کە گویا دەبێ ئەمن مامۆستا هێمنم بە فەقیرحاڵ ناساندبێ، ئەتۆ پێت وایە مامۆستا هێمن هەتا ئاخر ڕۆژەکانی ژیانی هەر لەسەر ئەو ڕێبازە ماوەتەوەو وەفادار بووە؟ ئەی ئەگەر وایە مامۆستا هێمن بۆ هاتەوە کوردستان؟ و بۆ دەستی کرد بە بڵاوکردنەوەی گۆڤاری سروە؟ کە بەقەدەر هەموو ڕاگەیاندنەکانی حیزبی دیموکرات خزمەتی بە زمان وئەدەبیاتی کوردی کرد و هەزاران شاگردی کوردی پێگەیاند. مەبەستی من لە فەقیر بوونی مامۆستا هێمن دڵ سافی و سەداقەت و خۆش باوەڕیەکەیەتی، نەک ئەوەی کە ئەتۆ بە غایە ئیشارەت پێکردووە. لە هەموو نوسینەکانی مندا ڕەنگی داوەتەوە کە مامۆستا هێمنم پێ سادق ترین وپاک ترین ئینسانی کۆمەڵی کوردەواری بوە، ئەگەر دەشت هەوێ لەخۆشەویستی من ومامۆستا هێمن حاڵی بی تەماشای بەشێک لەو نامەو وێنانە بکە کە لەناو کتێبەکانمدا هەیە. لە جێگایەکدا باس لەوە دەکەی کە گۆیا ڕەوتە پاک و بێگەردەکەتان هەر بەردەوامە.
پێشنیارت پێدەکەم لەبەر ئەوەی كۆماری پەت وسێدارە کەوتۆتە حاڵی غەر غەڕەو ڕەنگە زۆری نەمابێ پەشم و ڕیشی ناموبارەکیان تێکەوە پێچن و بەملی شکاویان سێبەری شووم ونگریسیان لەسەر سەری گەلانی ئێران ودونیا لە گۆڕ بندرێ. هەتا زووە و درەنگ نەبووە لەو ھەڵە مێژوویەی کردتان پاشگەز ببنەوە. زۆر کەس لە ئێوە هەر زۆر زوو دانیان بە هەڵەکانی خۆیان داناو سادقانە ڕای خۆیان بۆ کۆمەڵانی خەڵک ڕوون کردەوە بۆ نموونە کاک حوسێن بەخشی یان نەمر مامە غەنی کە هاتە ئاڵمان و لەوێڕا نامەیەکی بۆمن نوسیووە کە لێرەدا بڵاوی دەکەمەوە، بزانە چۆن بە سەرو گوێلاکی حیزبی تودەدا دێتەخوارو باسی هەڵەکانیشی دەکا، ئەگەر ئەمن بێ بەڵێنیم لەگەڵ کردبا بۆ ئه‌وەی کە له گەڵیان نەکەوتم لانیکەم یەک ئیشارەی چکۆڵەی بەو مەسەلەیە دەکرد. بۆ شەوی خیانەتەکەشت کە بەرانبەر بە ئێمە کردت و نەتهێشت پادگانی سەقز بگیرێ نامەکەی شەهید د. قاسملوو لە پاشکۆی ئەو نوسراوەیە دادەنێم. ڕەنگە کەم کەس هەبێ هێندەی من ڕەخنەی لە حیزبی دێموکرات گرتبێ و قەتیش پێم وا نەبووە کە هەزاران ئاوی پاکی پێدا کراوە. بەڵام ئەوەی ئێوە بۆ خۆش ڕەقسی كۆماری پەت و سێدارە دەتانکرد هیچی وا نەبوو. زیندانیکردنی مامۆستای هێمنم لە لایەن حیزبی دێموکراتەوە بە خەیانەت زانیوەو ئەو کاتیش ڕاشکاوانە ڕامگەیاندووە، کەلیمەی جاش و ڕاگەیاندنە خراپەکانی دیموکراتم لەسەر مامۆستا هێمن بە هەڵە زانیوەو هەر ئەو شتانەو زۆر بابەتیتریش بوونە هۆی ئەوەی کە نزیک بە چل ساڵە خەتی خۆم لێ جودا کردونەوە. بەڵام هەر هێرشێکی ناڕەوا لەلایەن هەر گروپ وتاقمێکەوە کرابێتە سەریان دیفاعم لێکردوون بێدەنگ نەبووم. لێرەدا داوا لە قەڵەم بەدەستان و ئینسانە دڵسۆزو وڵاتپارێزەکان دەکەم لەسەر نوسراوەکەی من و ئەو کۆنە هاوخەباتەم دەنگ وهەڵوێستیان هەبێ، بۆ ئەوەی کەسانێکی وەک ئەوانە کە دیفاع لە بڕیاری خومەینی دەکەن بۆ فتوای خەزای قەتڵ وعام کوژی کوردستان ئایا خەیانەت لەوە قێزەوەنتر هەیە.
تێبینی:
چه‌ند لاپه‌ڕه‌یه‌ك وه‌ك به‌ڵگه‌نامه كاك مه‌لا ره‌سوڵ هاوپێچی ئه‌م نووسراوه‌ی كردبوو، به‌لام بۆ هۆی پۆتانسێلی ته‌كنیكی ماڵپه‌ڕه‌كه‌مان ته‌نها توانیمان ئه‌مانه‌ی خواره‌وه بلاو كه‌ینه‌وه. ئه‌و به‌ڵگه‌نامه‌كانیتر له كتێبی بیره‌وه‌ریه‌كانی كاك مه‌لا ره‌سوڵ به ده‌ست ده‌كه‌وێ.
ده‌سته‌ی به‌ڕێوه‌به‌ری ماڵیه‌ڕی چار
